零售版綠色存款 穩陣收息新選擇

話說早兩個禮拜講開唔少老友記都問銀色債券應唔應該買，曉陽就覺得保證息率有5厘，實在係唔錯嘅選擇。

老友記有高息又穩陣嘅選擇，咁唔係老友記，又有無同樣唔錯嘅選擇？

有無諗過搞環保都可以賺穩定回報？講緊嘅係有本地銀行推出零售版本嘅綠色存款，呢類存款嘅資金係用喺合資格嘅可持續發展項目，包括可再生能源、能效提升、污染防治、清潔交通、可持續水資源與廢水管理、綠色建築、陸地與水域生態多樣性保護、生物資源與土地資源的環境可持續管理、氣候變化適應等。

以往呢一類產品只係提供畀企業客戶，今次呢一款存款產品，存款期雖然只有6個月，但年利率就有4.4厘，以風險較低又保本嘅投資產品嚟講，真係算唔錯，而且入場費只需要1萬蚊，唔少零售客戶都可以買得起。

曉陽唔係要賣廣告，只係想講，坊間近年開始多咗唔同種類嘅投資產品，尤其以往只係畀企業客戶，或者入場門檻比較高嘅大戶投資嘅產品，都開始開放畀小投資者參與。

所以，大家要開拓投資工具，其實可以多啲留意吓唔同機構新推出嘅產品，分分鐘會有意外驚喜。

（本欄逢周四刊登）